Víkingur Reykjavík hefur sent frá sér yfirlýsingu eftir leik liðsins við KR í úrvalsdeild karla um helgina.
Allt varð vitlaust á KR-vellinum í 2-0 sigri heimamanna en þrír Víkingar fengu að líta beint rautt spjald í viðureigninni.
Þar á meðal var Sölvi Geir Ottesen sem sagði fjórða dómara á meðal annars að ,,fokka sér“ er hann gekk af velli.
Knattspyrnudeild Víkings sendi frá sér yfirlýsingu og segist Sölvi að sama skapi harma eigin framgöngu í hita leiksins.
Víkingar skora á KSÍ að fara vel yfir atvikin og eru ekki sammála þeim spjöldum sem fóru á loft.
Yfirlýsing frá Knattspyrnudeild Víkings og Sölva Geir Ottesen:
,,Knattspyrnudeild Víkings lýsir yfir furðu sinni með framgöngu dómara í leik KR og Víkings á laugardag og skorar á dómaranefnd KSÍ að fara rækilega yfir málin. Að sama skapi teljum við framkomu Sölva Geirs Ottesen í kjölfar rauða spjaldsins sem hann fékk í leiknum óásættanlega. Það er ljóst að félagið verður án þriggja sterkra leikmanna á miðvikudag í leiknum gegn Val þar sem allir leikmennirnir eru á leið í leikbann. Það er skoðun okkar að dómarinn hafi gert mistök þegar hann lyfti rauða spjaldinu í öllum tilfellum. Mistök sem geta reynst félaginu ákaflega dýr.“
Sölvi Geir Ottesen:
„Ég harma framgöngu mína eftir að hafa fengið brottvísun í leik KR og Víkings sl. laugardagskvöld. Í hita leiksins snarreiddist ég þar sem ég taldi mig órétti beittan eftir að leikmaður KR ýtti mér svo ég féll á annan leikmann liðsins. Dómari leiksins mat það sem viljaverk að vinstri handleggur minn hafi lent í anditi leikmanns KR sem lá á vellinum. Ég átti hins vegar ekkert sökótt við leikmanninn, ásetningurinn var enginn og ég var aðeins að reyna að verjast falli.
,,Þrátt fyrir öll málsatvik á leikmaður með mína reynslu, og fyrirliði Víkings, hins vegar að vita betur og viðbrögð mín í hita leiksins voru mér, liðsfélögum og Knattspyrnufélagi Víkings ekki til sóma.“