Enn eitt málið varðandi dauða svarts manns af völdum lögreglunnar er komið upp í Bandaríkjunum og hefur verið efnt til mótmæla vegna málsins. Fjórum lögreglumönnum hefur verið vikið úr starfi vegna málsins og alríkislögreglan FBI rannsakar málið.
„Ég næ ekki andanum.“ Var eitt af því síðasta sem maðurinn, hinn fertugi George Floyd, sagði á mánudaginn áður en hann lést. Hann lá þá ber að ofan á götu úti í Minneapolis. Búið var að handjárna hann en lögreglumaður hélt honum föstum á götunni með því að þrýsta hné sínu á háls hans og hnakka.
Atburðurinn var tekinn upp og hefur myndbandið vakið mikinn óhug en það hefur verið í mikilli dreifingu á netinu. Mikil reiði er í Bandaríkjunum og víðar um heim vegna þeirra fordóma sem svartir einstaklingar mæta.
Ian Wright fyrrum framherji Arsenal og enska landsliðsins er orðinn þreyttur á ástandinu og þeim hlutum sem fólk sem er dökkt að hörund mætir. „Ég er þreyttur á þessu, við erum þreytt á þessu. Ummælin, svörin og að þurfa að útskýra okkar stöðu á hverjum degi,“ skrifaði Wright meðal annars.
Hann varð strax fyrir fordómum eftir að hafa sett færsluna út en ungur drengur í Írlandi kallaði hann meðal annars apa. Drengurinn ungi sá eftir ummælum sínum og gaf sig fram við lögregluna.
„Ég veit að ég á ekki að skoða þessi svör en þetta tekur virkilega á, þetta er barn að senda þetta. Þetta barn hefur beina línu inn til mín,“ sagði Wright.