PUMA hefur staðfest stóran samning við KSÍ, þetta var staðfest í fréttatilkynningu nú í morgun.

„Ég hef verið afar hrifin af þeim árangri sem Íslands hefur náð,“ sagði Björn Gulden stjórnarformaður PUMA. „Þrátt fyrir að vera fámenn þjóð þá hefur Íslands marga hæfileikaríka leikmenn. Það er frábært viðhorf þarna og það er góður liðsandi. Við erum spennt fyrir því að vinna með KSÍ.“

Í fréttatilkynningu Puma er talað um það magnaða afrek að Ísland með 330 þúsund íbúa hafi komið karlaliði sínu á EM 2016 og HM 2018. Þá er talað um frábæran árangur kvennalandsliðsins sem komst þrjú ár í röð inn á EM.

Ekki á að frumsýna nýja treyju Íslands fyrr en í júlí en netverjar telja að mynd af treyjunni hafi óvart lekið á netið. Þannig birti Puma frétt með mynd af Guðna Bergssyni og starfsmanni Puma ásamt treyju sem gæti verið nýr búningur Íslands.

„Accidental frumsýning á KSÍ lógóinu right here. Einhver landvættastemmning í gangi. Áhugavert;“ skrifar Andri Ólafsson fyrrum fréttamaður á Twitter.

Daníel Rúnarsson hönnuður og fyrrum ljósmyndari leggur orð í belg. „Úff smá klúður. En geggjað „skjaldarmerki“. Er að melta búninginn…svalur við fyrstu sýn, vona að þetta sé unique hönnun en ekki eitthvað sem þeir eiga á lager,“ skrifar Daníel.

„Gammur, griðungur, dreki, bergrisi. Nett,“ sagði Andri Ólafsson.

KSÍ mun þá einnig frumsýna nýtt merki á búningi sambandsins en þessa treyju sem Puma birti með frétt sinni má sjá hér að neðan.