Ingólfur Þórarinsson, var í skemmtilegu viðtali við hlaðvarpsþáttinn Fantasy Gandalf í gær og fór yfir knattspyrnuferil sinn og fleira gómsætt. Ingólfur var öflugur leikmaður en tónlistin tók fljótt yfir, hann reyndi þó að halda áfram í fótbolta en það með misgóðum árangri. Oft illa sofinn eftir brölt næturinnar, með gítarinn. Hann lék með uppeldisfélagi sínu á Selfossi en einnig með Fram og Víkingi í höfuðborginni.
Hann rifjaði upp sögu frá árinu 2010 þegar hann sótti þrjá leikmenn frá Senegal sem Selfoss fékk um mitt sumar, þeir styrktu liðið lítið en voru fljótir að vekja athygli í bænum.
,,Þegar þeir komu fyrst, þá komu þeir þrír saman held ég. Ég var beðinn um að sækja þá til Keflavíkur, þrír Senegalar,“ sagði Ingó við Fantasy Gandalf en bílferðin var skrautleg. ,,Ekki einn af þeim talaði stakt orð í ensku, þetta voru góðir tveir tímar í bílnum. Ég var að reyna að sýna þeim Bláa lónið, þeir vissu ekkert hvað það var. Svo Hellisheiði og Hveragerði, þeir voru að reyna að spyrja mig og ég skildi ekkert.
Ingó sagði svo við Huga Halldórsson og Ingimar Finnsson sem stýra þættinum að hann gæti ekki sagt þeim allt, það kæmi að þætti loknum. ,,Svo fóru þeir að leita af hinu og þessu á Selfossi en fundu ekki allt,“ sagði Ingó.
Samkvæmt heimildum DV röltu þeir félagar um bæinn og fóru í hið minnsta í tvær verslanir, þar spurðust þeir fyrir um hvar vændishúsið í bænum væri staðsett. Uppi varð fótur og fit í bænum og málið rætt á kaffistofum bæjarins næstu daga enda ekkert slíkt hús til á Íslandi.