Hjörvar Hafliðason, Kristján Óli Sigurðsson og Mikael Nikulásson velta því fyrir sér hvort það andi köldu á milli Hermanns Hreiðarssonar og Eiðs Smára Guðjohnsen. Þessu veltu þeir fyrir sér eftir að Hermann valdi draumaliðið af ferli sínum. ,,Vikulok Dr. Football – Eiður og Hemmi engir vinir,“ er heitið á nýjasta þætti Dr. Football.

Hermann var gestur í Draumaliðinu og var beðinn um að velja besta leikmanninn sem hann hafði spilað með í íslenska landsliðinu. ,,Margir helvíti góðir, Rúnar Kristinsson,“ sagði Hermann í þættinum og þessum ummælum velta þeir félagar í Dr. Football fyrir sér

,,Þetta er ekki eðlilegt,“ sagði Hjörvar Hafliðason en málið hefur vakið talsverða athygli, Eiður Smári átti magnaðan feril og lék lengi vel með Hermanni í íslenska landsliðinu.

,,Rúnar Kristinsson spilaði með ágætis liðum eins og Lokeren, en hann spilaði ekki með Chelsea og Barcelona. Þetta er mjög spes,“ sagði Mikael Nikulásson um málið.

Kristján Óli vill meina að þetta köld vatnsgusa í andlit Eiðs Smára. ,,Þetta er ísköld vatnsgusa framan í Guðjohnsen. Þetta eru tveir af okkar bestu landsliðsmönnum frá upphafi, hann nefnir ekki á nafn einu sinni.“

,,Eiður, það er ekki orð um hann,“ sagði Hjörvar og Mikael sagði að það væri augljóst að eitthvað hefði gengið á.