Páll Júlíusson, fyrrum framkvæmdastjóri KSÍ, er látinn. Páll fæddist í Reykjavík 20. september 1936 og lést þann 27. febrúar síðastliðinn.
Páll var mikill áhugamaður um íþróttir allt sitt líf. Hann lék knattspyrnu með Fram á yngri árum og lagði stund á körfuknattleik. Hann hætti íþróttaiðkun fremur ungur en snéri sér þá af miklum krafti að félagsmálahlið íþróttanna. Hann sat í stjórn Körfuknattleikssambands Íslands og var m.a. formaður KKÍ í tvö ár, sat í stjórn knattspyrnudeildar Fram í nokkur ár sem og í nefndum á vegum Knattspyrnusambands Íslands. Hann vann einnig ýmis störf fyrir knattspyrnudeild KA þau ár sem hann bjó norðan heiða.
Margir minnast Páls í dag og þar á meðal er Bragi Bergmann, fyrrum dómari sem var einn fremsti dómari landsins um langt skeið. ,,Þegar ég fór að dæma knattspyrnuleiki í deildakeppninni upp úr 1980 kynntist ég nýrri hlið á Palla, sem þá var orðinn skrifstofustjóri KSÍ. Þau samskipti voru með miklum ágætum. Eftir að hann lét af störfum á skrifstofu KSÍ varð hann eftirlitsmaður dómara og mætti sem slíkur m.a. á marga leiki sem ég dæmdi til að gefa dómarateyminu umsögn. Það starf rækti hann af samviskusemi, var ávallt sanngjarn og samkvæmur sjálfum sér,“ skrifar Bragi Bergmann um Pál.
Árið 1980 var Páll ráðinn skrifstofustjóri KSÍ og sá starfstitill breyttist í framkvæmdastjóra áður en hann hætti störfum hjá KSÍ árið 1991. Eftir það var hann virkur í starfi eftirlitsmanns knattspyrnudómara í rúman aldarfjórðung.
KSÍ kveður fallinn félaga, sendir innilegar samúðarkveðjur til fjölskyldu og ástvina og þakkar Páli hans mikla starf í þágu knattspyrnuhreyfingarinnar.
