Hannes Þór Halldórsson var gráti næst þegar hann ræddi um framtíð sína með landsliðinu eftir 0-4 tap gegn Englandi. Hann veit ekki hvort hann hafi spilað sinn síðasta landsleik.
Hannes hefur staðið vaktina í markinu í gegnum bestu ár í knattspyrnusögu Ísland. „Ég veit það ekki,“ sagði Hannes við Henry Birgi Gunnarsson á Stöð2 Sport í kvöld þegar hann var spurður um hvort þetta hafi verið hans síðasti landsleik.
„Það verður að koma í ljós. Ef það fer svo, þá var þetta góður tímapunktur. Að jafna Birki Kristinsson vin minn í leikjafjölda,“ sagði Hannes sem lék sinn 74 landsleik í kvöld og jafnaði met Birkis Kristinssonar yfir fjölda landsleikja fyrir markvörð.
„Framhaldið verður að koma í ljós, það er mikið af tilfinningum í þessu núna. Erum að jafna okkur á því að hafa ekki komist á Evrópumótið, þessu hörmulega tapi um daginn. Núna eru nokkrir mánuðir í næsta verkefni, það þarf að ráða þjálfara og draga. Ég var að horfa á að spila þetta Evrópumót og svo hefði maður séð til, við sjáum til hvernig þetta þróast.“
Hannes sagði að leikmenn liðsins hefðu farið þetta á hnefanum síðustu daga eftir tapið gegn Ungverjum og felldi tár þegar hann fór að hugsa til baka og í framtíðina.
„Þetta tók mjög á okkur þessi Ungverja leikur, það er búið að taka á að rífa okkur aftur í gang. Það er eins og hafi maður farið þetta á hnefanum, tilfinningarnar eru að koma út núna. Mögulega síðasti leikur hjá mörgum sem hafa spilað saman lengi.“