José Mourinho, knattspyrnustjóri Tottenham, lét óánægju sína með landsleikjahléið í ljós með kaldhæðnislegu innleggi á samfélagsmiðlinum Instagram í dag. Matt Doherty, leikmaður Tottenham, hefur verið greindur með Covid-19 í landsliðsverkefni með Írlandi.
„Frábær vika af fótbolta að baki. Miklar tilfinningar í landsleikjunum, frábærir vináttuleikir og fyllsta öryggis gætt,“ stóð meðal annars í færslu Mourinho.
Það má lesa úr færslu Mourinho að hann sé ósáttur með það hvernig staðið sé að öryggismálum í landsleikjunum. Meðal annars framkvæmd á Covid-19 skimunum þar sem hann segir að niðurstöður berist leikmönnum eftir leik.
Knattspyrnustjórinn slær síðan á létta strengi í lok færslunnar.
„Eftir enn eina æfinguna þar sem ég þjálfa sex leikmenn er nú kominn tími til þess að ég slaki á,“ skrifaði Mourinho.
Mourinho hafði fyrr í mánuðinum lýst yfir óánægju sinni með landsleikjahléið. Hann bjóst aðeins við neikvæðum fréttum um leikmenn sína eftir hléið.
„Ég býst aldrei við góðum fréttum frá landsliðunum, ég býst bara við neikvæðum hlutum. Aldrei góðum hlutum,“ sagði Mourinho í viðtali fyrir leik Tottenham og Ludogorets í Evrópudeildinni fyrr í mánuðinum.
View this post on Instagram