Íslenska kvennalandsliðið í knattspyrnu mætir því sænska í Svíþjóð eftir tæpa klukkustund. Leikurinn er liður í undankeppni Evrópumeistaramótsins sem fram fer á Englandi 2022.
Fyrri leikur Íslands og Svíþjóðar í undankeppninni fór fram á Laugardalsvelli þann 22. september. Leiknum lauk með 1-1 jafntefli. Elín Metta Jensen skoraði mark Íslands eftir langt innkast frá Sveindísi Jane Jónsdóttur.
Ein breyting er á íslenska liðinu frá því í síðasta leik. Hlín Eiríksdóttir kemur inn fyrir Dagnýju Brynjarsdóttur sem er meidd. Hlín Eiríksdóttir er fædd árið 2000 og er þetta hennar 16. landsleikur.
Ungu leikmenn liðsins, Sveindís Jane Jónsdóttir, Karólína Lea Vilhjálmsdóttir og Alexandra Jóhannsdóttir, sem slógu í gegn í fyrri leik liðanna eru allar í byrjunarliði.
Sara Björk Gunnarsdóttir mun í kvöld bæta leikjamet Katrínar Jónsdóttur, fyrrverandi fyrirliða liðsins. Leikurinn gegn Svíþjóð verður 134. landsleikur Söru Bjarkar.
Liðin eru í fyrsta og öðru sæti F riðils. Sigurliðið fer langt með að tryggja sér sæti í lokakeppninni. Svíþjóð er á toppi riðilsins með 16 stig eftir sex leiki. Ísland er í öðru sæti með 13 stig eftir fimm leiki. Slóvakía og Ungverjaland eru með sjö stig og Lettland er án stiga.
Sigurliðið í hverjum riðli fer beint á EM. Þrjú lið með bestan árangur í öðru sæti fara einnig beint á EM. Restin af þeim liðum sem enda í öðru sæti í sínum riðli fara í umspil um að komast í lokakeppnina.
Ísland hefur tvisvar sigrað Svíþjóð. Sigrarnir komu báðir á Algarve Cup. Síðast árið 2014 þar sem Sara Björk Gunnarsdóttir og Harpa Þorsteinsdóttir skoruðu mörkin í 2-1 sigri. Árið 2011 skoruðu Margrét Lára Viðarsdóttir og Katrín Jónsdóttir í leik sem einnig fór 2-1 fyrir Íslandi. Svíþjóð hefur sigrað 12 viðureignir liðanna og tveimur hefur lyktað með jafntefli.
Leikurinn verður í beinni útsendingu á RÚV og hefst útsending klukkan 17:00.
1 – Sandra Sigurðardóttir (M)
4 – Glódís Perla Viggósdóttir
5 – Gunnhildur Yrsa Jónsdóttir
6 – Ingibjörg Sigurðardóttir
7 – Sara Björk Gunnarsdóttir (Fyrirliði)
8 – Karólína Lea Vilhjálmsdóttir
11 – Hallbera Guðný Gísladóttir
14 – Hlín Eiríksdóttir
15 – Alexandra Jóhannsdóttir
16 – Elín Metta Jensen
23 – Sveindís Jane Jónsdóttir
