Roy Keane fyrrum fyrirliði Manchester United telur að leikmenn félagsins muni henda Ole Gunnar Solskjær fyrir rútuna og kosta hann þannig starfið.
Manchester United fékk skell um liðna helgi gegn Tottenham og Keane fannst erfitt að horfa á það. „Þetta var til skammar, við eigum allir slakan leik en þetta var skammarlega lélegt. Frammistaðan hjá nokkrum leikmönnum var hræðileg,“ sagði Keane.
Keane hefur í mörg ár talað um að í hópi United séu leikmenn sem leiki tveimur skjöldum, þeir stingi stjórann sinn í bakið og komist þannig upp með miðlungs frammistöður ár eftir ár.
„Það eru of margir þarna sem stinga þig í bakið og munu kosta Ole starfið, þessir leikmenn hafa gert það við fyrrum stjóra og þeir munu gera það sama við Ole.“
Solskjær hefur stýrt United í tæp tvö ár en vond byrjun á tímabilinu hefur sett af stað sögusagnir þess efnis að hann verði rekinn.
