Jhon Viáfara, fyrrverandi landsliðsmaður Kólumbíu í knattspyrnu, hefur verið framseldur til Bandaríkjanna til að svara til saka í umfangsmiklu fíkniefnamáli.
Viáfara þekkja eflaust margir aðdáendur enska fótboltans því hann spilaði um tíma með Portsmouth og Southampton. Hann spilaði fjórtán leiki með Portsmouth og 76 leiki með Southampton á árunum 2005 til 2008. Í millitíðinni lék hann sem lánsmaður með Real Sociedad. Þá lék hann 34 landsleiki fyrir Kólumbíu á árunum 2003 til 2010. Skórnir fóru upp í hillu árið 2015.
Viáfara var handtekinn í mars í fyrra vegna gruns um aðild að Gulf Clan-glæpasamtökunum í Kólumbíu. Hann er talinn hafa átt þátt í að smygla miklu magni af kókaíni frá Mið-Ameríku til Bandaríkjanna. Verðmæti efnanna er talið nema rúmum þremur milljörðum króna.
Verði Viáfara fundinn sekur gæti hann átt mjög þungan dóm yfir höfði sér.