Keflavík sigraði Eyjamenn í Lengjudeildini í dag og styrkti þar með stöðu sína á toppi deildarinnar. Í Keflavík skoruðu heimamenn fyrsta mark leiksins á sjöundu mínútu. Þar var að verki Davíð Jóhannsson. Gary Martin jafnaði fyrir Eyjamenn á 41. mínútu og staðan því jöfn í hálfleik.

Keflavík komst yfir á 50. mínútu með marki frá Sindra Guðmundssyni. Frans Elvarsson jók mun heimamanna með marki úr vítaspyrnu á 64. mínútu og róðurinn orðinn þungur fyrir ÍBV. Fleiri urðu mörkin ekki. Eyjamenn eru í fimmta sæti með 30 stig og Keflavík í því fyrsta með 40 stig.

Eftir leik var hasar en Gary Martin sóknarmaður ÍBV greinir frá því á Twitter. Í samtali við blaðamann sagði hann að leikmaður Keflavíkur hefði öskrað inn í klefa ÍBV að leik loknum, það voru Eyjamenn ósáttir við.

Guðmundur Auðunn stuðningsmaður Keflavík bauð Gary til Keflavíkur eftir tímabilið en allt stefnir í að Keflavík fari upp í efstu deild.

„Nei takk, það eru leikmenn þarna sem kunna ekki að bera virðingu, þeir öskra eitthvað um mig inn í klefa og hlaupa svo í burtu og þora ekki að koma út,“ skrifar Gary um málið á Twitter í kvöld.

„Einn leikmaður Keflavíkur öskraði eins og tík og hljóp svo inn í klefa og þorði ekki að mæta út þegar ég vildi tala við hann.“

Framherjinn frá Darlington er líklega á förum frá ÍBV en hann hafði greint frá því að hann hugðist ekki spila áfram með liðinu ef það kæmist ekki upp í efstu deild.