Helder Costa kom Leeds snemma yfir í leiknum en hann skoraði þegar einungis 5 mínútur voru liðnar. Leeds hélt forskotinu í hálftíma en þá fengu þeir dæmt á sig víti. Aleksandar Mitrovic fór á punktinn, skoraði og jafnaði metin fyrir Fulham.
Það leið þó ekki langur tími þangað til Leeds fékk líka víti. Sex mínútum eftir að Fulham jafnaði náði Mateusz Klich að koma Leeds aftur yfir með marki úr vítinu. Staðan var því 2-1 fyrir Leeds í hálfleik.
Snemma í seinni hálfleik náði Patrick Bamford að koma Leeds í tveggja marka forystu og stuttu síðar náði Helder Costa þriggja marka forystu fyrir Leeds. Fulham-menn voru þó ekki búnir að gefast upp. Harrison Reed minnkaði muninn á 62. mínútu og Mitrovic skoraði sitt annað mark fimm mínútum síðar. Fleiri urðu mörkin þó ekki og var lokaniðurstaðan því 4-3 fyrir Leeds.
