Bjarnólfur Lárusson fyrrum knattspyrnumaður er í skemmtilegu spjalli við Hafliða Breiðfjörð á Fótbolta.net. Um er að ræða hlaðvarpsþátt sem Hafliði heldur úti.

Bjarnólfur ræðir um ferð sem hann fór til Skotlands 16 ára gamall. Miðað við það var ferðin árið 1992 en Bjarnólfur fór til reynslu hjá stórliðinu, Rangers ásamt Gunnari Sigurðssyni og Daða Pálssyni.

Bjarnólfur hafði vanið sig á þann ósið á Íslandi að hnupla treyjum í æfinga og keppnisferðum. Það hélt áfram í Skotlandi.

„Eftir æfinguna ákváðum við að halda þessum leiðinda ávana áfram og stálum allskonar æfingaklæðnaði og handklæðum og sokkum og allskonar drasli. Við héldum að það væri við lýði þar úti líka sem var alls ekki. Strákarnir klöguðu okkur og sögðu að það væri þjófalýður mættur frá Íslandi á Ibrox og væri að stela æfingagöllum,“ sagði Bjarnólfur við Hafliða á Fótbolta.net.

Ákveðið var að senda íslensku drengina heim en þeir bjuggu hjá David Moyes Sr, sem er faðir David Moyes knattspyrnustjóra West Ham.

„Hann var búinn að vinna sitt ævistarf í kringum félagið og þetta var mikill blettur fyrir hann kallgreyið. Flug til Glasgow var tvisvar í viku svo við þurftum því að bíða í 3-4 daga hjá honum eftir næsta flugi og fórum svo heim með skottið milli lappanna.“