Robin van Persie, fyrrum framherji Manchester United rifjar upp skemmtilega sögu af Sir Alex Ferguson í viðtali sem hann fór í á dögunum. Van Persie kom til Manchester United árið 2012 og varð enskur meistari með liðinu tæpu ári síðar.
Þetta var eini stóri titill Van Persie á Englandi en Sir Alex Ferguson keypti hann til félagsins, en hætti ári síðar.
Undir lok tímabilsins tapaði United fyrir grönnum sínum í Manchester City, forysta liðsins á toppnum varð þá tíu stig. Daginn eftir sauð svo á Ferguson. ,,Hann mætti inn í klefa með mynd af tveimur leikmönnum sem höfðu farið á næturlífið og talaði um þá sem drullusokka,“ sagði Van Persie.
Leikmennirnir tveir sem Van Persie nefnir ekki á nafn höfðu farið á næturbrölt beint eftir leik. ,,Ég veit nöfnin en get ekki sagt frá þeim, stjórinn slátraði þeim. Hann setti upp myndir af þeim frá klukkan 02:00 um nóttina og til klukkan 04:00. Hann hætti ekki, hann sagðist selja þá sem myndu láta sér detta það í hug að fá sér í glas, þangað til sigurinn væri í höfn.“
,,Hann var brjálaður, eftir þessa ræðu fór ég á tvær erfiðustu æfingarnar á lífsleiðinni. Við unnum að lokum titilinn.“