Hörður Snævar Jónsson skrifar frá Tirana
Arnór Ingvi Traustason er mættur til Albaníu ásamt íslenska landsliðinu sem spilar í undankeppni EM á morgun.
Ísland spilar gríðarlega mikilvægan leik við Albaníu og við ræddum við Arnór fyrir verkefni morgundagsins.
Arnór byrjaði síðasta leik í 3-0 sigri á Moldóva og er að standa sig vel með Malmö í Svíþjóð.
,,Þetta var ágætis flug svosem þó þetta hafi verið fimm tímar. Ég svaf vel í nótt sem er gott,“ sagði Arnór.
,,Ég er að standa mig vel með Malmö og langaði að spila í þessu verkefni. Mig langaði að starta og það kom mér ekkert rosalega á óvart en aftur á móti er alltaf heiður að spila með landsliðinu.“
,,Ég hef spilað vel með með Malmö og meiðslin koma á óheppilegum tíma, ég var á góðu róli en mér finnst ég hafa bara farið beint aftur í það form sem ég var í. Mér líður vel á vellinum og reyni að vinna mér inn sæti.“
,,Við getum ekkert verið að misstíga okkur og ætlum ekki að gera það. Þetta mun 100 prósent ráðast á þessum tveimur leikjum í nóvember og ef við gerum okkar þá vinnum við þá á morgun.“
Síðasti leikur fór 3-0 gegn Moldóva á laugardalsvelli en leikurinn á morgun ætti að vera mun erfiðari.
,,Við gerðum það sem við þurftum gegn Moldóva og ekki meira en það. Þetta var ekki besti leikurinn okkar en við gerðum það sem við þurftum að gera. Við gerðum þrjú mörk og fáum á okkur ekkert.“
,,Hér verður þetta mun erfiðara en þetta er verkefni sem við teljum að við eigum að gera vel í og taka.“
Íslenska liðið er að taka við sér eftir erfitt gengi í Þjóðadeildinni í fyrra þar sem við fengum skell eftir að hafa spilað á HM í Rússlandi.
,,Allir bjuggust við því að við myndum ganga yfir Sviss og Belgíu eftir því sem undan hafði gengið. Okkur gekk vel gegn stórum þjóðum en svo fengum við skell.“
,,Mér finnst við hafa unnið vel úr því og erum á toppnum ásamt Frökkum og Tyrkjum og gerum að gera vel. Ég skil alveg þessa neikvæðu umræðu.“
,,Við vissum alveg af hverju þetta var. Hún átti rétt á sér og ef eitthvað var þetta smá spark í rassinn.“
,,Það eru allir klárir og það eru þrjú stig sem skipta máli á morgun.“