Landslið Íslands leikur með sorgarbönd gegn Moldóvu í dag vegna fráfalls Atla Eðvaldssonar, fyrrverandi landsliðsfyrirliða og landsliðsþjálfara.
Atli féll frá í vikunni eftir hetjulega baráttu við krabbamein. Tólfan, stuðningsmenn Íslands ætla að minnast Atla með fána. Þar eru frasar sem Atli notaði á ferlinum.
,,Sjá mann og bolta,“ er frasi sem Atli notaði talsvert sem þjálfari.
Þessi merki maður fellur frá 62 ára gamall en hann hafði tjáð sig ítarlega um baráttuna við krabbameinið.
„Ég upplifði að allt það sem var í boði í læknavísindum vestræna heimsins, það er allt sem skerðir lífsgæði verulega. Þessi lyf, þetta er ofboðslegt eitur. Ég var búinn að lesa mig til þetta, og hugsaði að ef ég fæ þennan sjúkdóm, þá ætla ég að gera þetta svona,“ sagði Atli við Bylgjuna um liðna páska.