Manchester United hefur leik í Evrópudeildinni á morgun er liðið spilar við FC Astana frá Kasakstan.
United spilar fyrsta leikinn á heimavelli en með Astana spilar Rúnar Már Sigurjónsson.
Ole Gunnar Solskjær er stjóri United en hann kannast við Rúnar og vildi fá hann til Noregs á sínum tíma.
Það var Íslendingavaktin sem vakti athygli á þessu en Solskjær ræddi við Prosports frá Kasakstan í dag.
Solskjær var áður stjóri Molde í Noregi og þá vildi hann fá Rúnar til félagsins.
,,Við höfum fylgst með síðustu leikjum Astana, sérstaklega leikjunum þeirra í Evrópudeildinni,“ sagði Solskjær.
,,Liðið er sterkt á heimavelli og er með góða leikmenn innanborðs. Ég kannast við Rúnar Má í þessu liði. Ég vildi fá hann til Molde þegar ég var þar.“
Rúnar er sjálfur harður stuðningsmaður United og fær að upplifa drauminn á morgun.
