Ólafur Kristjánsson, þjálfari FH, sá sína menn spila við Stjörnuna í Pepsi Max-deild karla í kvöld.
Leiknum lauk með 2-2 jafntefli en FH jafnaði metin á tveimur mínútum eftir að hafa verið 2-0 undir.
,,Þetta var súrsætt fannst mér. Mér fannst við fá færi í fyrri hálfleik en Stjarnan var kannski með yfirhöndina,“ sagði Ólafur við Stöð 2 Sport.
,,Við komum vel til baka og verður maður ekki að taka þessum stigum eins og þeim stigum sem maður fær.“
,,Það er erfitt rétt eftir 2-2 leik þar sem allt er vitlaust að tala um hvað við gerðum best. Við komumst ágætlega upp en það vantaði skerpu á síðasta þriðjungi og end productið var ekki til staðar.“
Ívar Örri Kristjánsson dæmdi leikinn í dag en bæði Ólafur og Rúnar Páll Sigmundsson létu hann aðeins heyra það í leikslok. Ólafur var ekki viss um hvort vítið sem Stjarnan fékk í seinni hálfleik hafi verið rétt.
,,Þarna voru tveir þjálfarar aðeins brjálaðir út í dómarann. Eins og ég sé þetta þá tekur Atli boltann en endursýningin segir mögulega eitthvað annað.“
,,Aukaspyrnan sem þeir fengu í aðdraganda vítisins fannst mér mjög soft, það segir sína sögu að tveir þjálfarar séu kolbrjálaðir út í dómarann.“