Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Garðar Gunnlaugsson sem ólst upp á Akranesi, gríðarleg pressa var á honum frá unga aldri enda bræður hans hetjur á Akranesi, Arnar og Bjarki.

Eins og flestir vita var Garðar giftur fyrirsætunni Ásdísi Rán Gunnarsdóttur og bjuggu þau saman í Búlgaríu. Þau skildu árið 2012.

Ásdís varð fræg þar í landi áður en þau höfðu lent á flugvellinum. Æsifréttamennskan í Búlgaríu er gríðarleg.

Garðar skrifaði undir samning við CSKA Sofia árið 2008 en það var Ásdís sem fékk mestu athyglina er þau komu til landsins í fyrsta sinn.

,,Það er svolítil æsifréttamennska þarna í Búlgaríu. Þetta er eiginlega mini Hollywood,“ sagði Garðar.

,,Það er rosalega mikið af æsifréttablöðum og glanstímaritum. Þeir gúggluðu mig þegar ég var að koma í klúbbinn og hafa væntanlega séð myndir af mér og Ásdísi.“

,,Hún er ljóshærð og eins og hún er bara. Allar konur í Búlgaríu eru mjög dökkar, með svart hár og allt þetta.“

,,Ljóshært fyrir þeim er bara geggjað sko. Hún einhvern veginn varð fræg áður en hún kom þangað.“

Ásdís fangaði alla athyglina eftir komuna til Búlgaríu og var hún ítrekað mynduð á flugvellinum eftir lendingu.

Ásdís nýtti sér síðar þessa frægð og stofnaði á meðal annars fyrirtækið Ice Queen og var með verslun í Búlgaríu.

,,Þegar hún kemur í fyrsta skiptið þá bíða bara eftir henni papparazzis á flugvellinum sem var mjög fyndið.“

,,Eins klár og hún er í viðskiptum þá nýtti hún sér það og kom sér á forsíður í öllum glanstímaritunum þarna.“

,,Þetta er rosalega mikið eins og í Bretlandi. Þau voru með svona þætti um ‘WAGS’  eða ‘wives of footballers’. Við vorum í einhverjum svoleiðis þætti þar sem henni var fylgt á eftir.“

,,Ég kom við í einhverjum af þessum þáttum en það var aðallega verið að fjalla um hana og hennar líf.“