Jesse Lingard, leikmaður Manchester United, hefur tjáð sig um mikla erfiðleika sem hann er að glíma við utan vallar.

Lingard hefur ekki verið upp á sitt besta á tímabilinu en það er vegna vandræða utan vallar sem tengjast fjölskyldu hans.

Lingard opnaði sig í viðtali við the Daily Mail og segir þar frá veikindum móður sinnar. Hann hefur fengið verulegt skítkast fyrir frammistöðuna á tímabilinu.

Enski landsliðsmaðurinn opnaði sig í samtali við Ole Gunnar Solskjær, stjóra United, og hefur fengið tíma til að takast á við þessi vandræði undanfarnar vikur.

,,Ég var ekki að standa mig vel og hann lét mig ekki vera. Hann vildi alltaf meira frá mér,“ sagði Lingard.

,,Ég taldi að það væri best að koma öllu frá mér og segja honum að hausinn á mér væri ekki í lagi. Ég bankaði upp á hjá honum.“

,,Ég er vanalega mjög hress og vil sjá fólk brosa en fólk hefur tekið eftir breytingum hjá mér.“

Lingard sér sjálfur um systkyni sín þessa stundina en þau búa heima hjá honum og fá menntun þar.

Bróðir hans heitir Jasper og er 14 ára gamall og systir hans er 11 ára gömul og ber nafnið Daisy-Boo.

,,Ég hef verið miður mín og haft miklar áhyggjur. Það var eins og öll ábyrgðin væri send á mig og væri á mínum herðum: ‘Hérna Jesse, þú tekur á þessu sjálfur.’

,,Mamma mín hefur glímt við ýmislegt í mörg ár en fékk enga hjálp. Nú fær hún hjálp. Ég hef því verið að sjá um systkini mín. Þau eru hjá mér.“

,,Það er erfitt að sjá þá sem þér þykir vænt um glíma við vandræði en ég þarf að mæta í vinnuna á hverjum degi og gera mitt.“