Það vakti athygli í gær þegar Íslenska landsliðið mætti til leiks gegn Andorra að Hannes Þór Halldórsson, markvörður liðsins gekk inn á völlinn með syni sínum. Bergur Ari Hannesson, aðeins þriggja ára var mættur með pabba sínum. Ísland vann 2-0 sigur.

Það er ekki sjaldséð að sjá börn leikmanna labba inn á völlinn með þeim, en Bergur er í yngri kantinum. ,,Þetta er mjög skemmtilegt, ég á tvö börn og labbaði til leiks með dóttir mína gegn Moldóvu, í síðasta mánuði og núna yngri strákinn. Hann var ekki til friðs að fá að gera það sama,“ sagði Hannes þegar við spurðum hann út í þetta eftir leik í gær.

KSÍ vill helst að börnin sem leiði leikmenn til leiks séu 6 ára eða eldri, Bergur fékk undanþágu enda styttist í annan endan á landsliðsferli Hannesar. ,,Hann fékk undanþágu og stóð sig bara vel. Þetta var mjög skemmtilegt.“

Það vakti athygli að Bergur var mættur í markmannshanska líkt og pabbi hans, ekki oft sem það sést þegar börn leiða leikmenn til leiks. ,,Hann var bara alveg eins og pabbi sinn, var klár í leikinn.“

Hannes segir það vera skemmtilega stund að labba til leiks með börnin sín. ,,Ef ég tala fyrir sjálfan mig, þá er þetta skemmtilegt krydd. Maður er stoltur af börnunum sínum, það eru gaman ef þau er stolt af pabba sínum. Fái aðeins kynnast þessu umhverfi, ég hefði gefið mikið fyrir að prófa þetta þegar ég var barn. Þetta er skemmtilegt fyrir alla.“

Hér að neðan má sjá Hannes og Berg mæta til leiks.

Bergur Ari Hannesson, 3 ára leiddi pabba sinn, Hannes Þór Halldórsson inn á fyrir leik Íslands og Andorra. Að sjálfsögðu var hann í markmannshönskum eins og pabbinn. #ISLAND pic.twitter.com/xJzWrO0FK8

— RÚV Íþróttir (@ruvithrottir) October 14, 2019