Það getur verið hættulegt að spila knattspyrnu í Suður-Ameríku en þar eru mjög blóðheitir stuðningsmenn.
Það sama má segja um mörg lönd í Evrópu en ástríðan í Suður-Ameríku þykir vera meiri en annars staðar.
Ógnvekjandi atvik átti sér stað um helgina þegar Millonarios og Medellin áttust við í efstu deild í Kólumbíu.
Það er rígur þar á milli en Millonarios vann 2-1 útisigur með sigurmarki á 93. mínútu leiksins.
Þá trylltist einn stuðningsmaður heimaliðsins og kastaði beittum hníf í áttina að David Macalister Silva, leikmanni Millonarios.
Silva tók upp hnífinn og sýndi dómara leiksins hann og má búast við að Medellin eigi yfir höfði sér harða refsingu.
