Rúrik Gíslason, leikmaður Sandhausen í Þýskalandi var ekki í leikmannahópi liðsins gegn Heidenheim í dag. Ástæðan er sögð vera agabann.

Þýskir miðlar fjalla um málið í kvöld en Sandhausen vann 2-0 sigur. Rúrik hafði spilað vel í upphafi móts, því kom á óvart að sjá hann ekki í leikmannahópnum.

Refsingin sem Rúrik tók út, er sögð vera vegna atviks sem átti sér stað á æfingu Sandhausen í vikunni. Hann ku hafa brotið nokkuð harkalega á samherja sínum, þegar hann var að hefna sín.

Þjalfari Sandhausen vildi ekki segja frá því hvað Rúrik hefði gert, hann staðfesti hins vegar að kantmaðurinn hefði brotið agareglur.

Ekki er talið að Rúrik fái meiri refsingu en þetta en hann mætir til æfinga hjá Sandhausen á morgun.

Rúrik hefur átt fast sæti í íslenska landsliðshópnum en nýr hópur verður kynntur í vikunni.