Grindavík vann virkilega góðan sigur í Pepsi Max-deild karla í kvöld er liðið fékk KR í heimsókn.

Grindavík skoraði tvö mörk í fyrri hálfleik og reyndist það nóg til að tryggja 2-1 sigur. Björgvin Stefánsson minnkaði muninn fyrir KR í þeim seinni.

Hér má sjá það góða og slæma úr leiknum.

Plús:

Þvílíkur sigur hjá Grindvíkingum! Fyrsta tap KR á árinu en liðið hafði verið óstöðvandi á undirbúningstímabilinu.

Það er alvöru karakter í þessu liði Grindvíkinga. Það eru kannski meiri gæði í öðrum liðum en þeir vilja stig og ná í stig.

Spilamennska Grindvíkinga var oft á tíðum mjög lagleg og þá sérstaklega í fyrri hálfleik. Náðu að búa til mikið pláss.

Pressa KR-inga var veruleg undir lok leiksins en heimamenn héldu þetta út. Misstu ekki hausinn, vel gert.

Mínus:

Þetta eru leikir sem KR þarf að vinna ætli liðið sér titilinn. Voru meira með boltann en sköpuðu ekki nógu mikið.

Það er eins og það þurfi aðeins að hrista upp í þessu hjá KR. Oftar en ekki þá treystir liðið alltof mikið á Óskar Örn.

Seinna mark Grindvíkinga átti aldrei að koma. Pablo Punyed var dæmdur brotlegur innan teigs en sá vítaspyrnudómur var rangur.

Vladimir Tufegdzic ákvað að blekkja dómarann og féll með tilþrifum. Það væru 10 vítaspyrnur í hverjum leik ef þetta er brot. Upp með þig drengur.

Það kom upp ‘panic’ í KR liðinu seint í seinni hálfleiknum. Það var öllu bombað inn í vítateiginn. Það er allt í lagi að taka sinn tíma í hlutina.