Skúli Jón Friðgeirsson, varnarmaður KR veit ekki hvort hann geti spilað fótbolta á morgun eða á næsta ári. Ástæðan er mjög slæmt höfuðhögg sem Skúli fékk á dögunum, hann man ekkert eftir atvikinu.
Skúli er einn mikilvægasti leikmaður KR, fjarvera hans gerir liðið fremur þunnskipað í öfustu línu. ,,Ég er í þeirri stöðu að ég hef lítið getað hreyft mig, ég er enn þá að glíma við einkenni eftir þetta högg. Á meðan ég finn fyrir þeim, þá má ég ekki gera neitt,“ sagði Skúli þegar blaðamaður ræddi við hann í dag.
,,Þetta er þannig dæmi að ég gæti verið klár eftir tvær vikur, ég gæti líka bara verið klár í haust eða á næsta ári. Þetta er algjör óvissa, mér líður aðeins betur en ekki alveg nóg.“
Skúli skall saman við Arnór Svein Aðalsteinsson á æfingu KR, ekki var bolti í kring. Þeir hlupu hreinlega saman, algjört slys.
,,Þetta var algjört slys, við vorum bara að hlaupa og sáum ekki hvorn annan. Við skullum saman, ég man ekkert eftir atvikinu. Ég rotaðist ekki, en ég var alveg ruglaður bara í 10-15 mínútur eftir atvikið.“
,,Ég er að komast á það stig að geta hreyft mig aðeins, ég er að verða það góður. Ég þarf að gera þetta mjög hægt, ég fer ekki almennilega af stað fyrr en öll einkenni hverfa. Ég fór af stað fyrst eftir einhverja tíu daga, þá kom mikið bakslag. Ég var handónýtur í 2-3 vikur eftir það.“
Óvissan með svona meiðsli er mikil, á meðan einkennin hrjá Skúla. Má hann ekkert gert.
,,Þetta eru ömurleg meiðsli, venjulega þegar þú ert frá þá færðu einhvern tímaramma. Í svona meiðslum, getur enginn sagt neitt. Þú verður bara finna það hjá sjálfum þér, það gæti komið á morgun eða eftir mánuð, það er algjör óvissa.“
