Ólafur Kristjánsson, þjálfari FH, var ánægður með stigin þrjú sem liðið fékk gegn KA í kvöld.

FH vann 3-2 sigur í Kaplakrika en KA vildi fá víti undir lok leiksins, Óli Stefán Flóventsson, þjálfari gestanna, var hundfúll eftir leik.

Óli Kristjáns segist skilja reiði kollega síns en segir það sorglegt að það skuli vera umræðan eftir svo góðan leik.

,,Þegar að einhver dettur í teignum? Ég hugsa að ég hefði alveg beðið um víti í sömu stöðu,“ sagði Ólafur.

,,Ég sit niður í gryfjunni og það voru menn með mér á bekknum sem sögðu að aukaspyrnan sem leiðir til vítaspyrnunnar sem við fengum hafi verið inni í teig. Svo var ég ekki sáttur þegar það var dæmt á Atla Guðna þegar þeir fá aukaspyrnuna sem þeir skora úr.“

,,Ég skil alveg svekkelsið í Óla Stefáni, þeir voru búnir að komast yfir í leiknum og voru feikilega öflugir og eru flott lið. Ég skil hann alveg mæta vel en svona er þetta. Það er hundfúlt að þetta skuli vera umræðan eftir svona fjörugan fótboltaleik.“

,,Ég trúi því ekki að það sé erfitt að dæma víti á FH í Kaplakrika en ég vona að við getum ekki tilefni til þess að það séu dæmd víti.“

Nánar er rætt við Óla hér fyrir neðan en viðtalið er í tveimur hlutum. Við biðjumst afsökunar á því.