Íslandsmeistarar Vals eru úr leik í Mjólkurbikar karla eftir leik við FH á Origo-vellinum Í gær. Valur fékk FH í heimsókn á Hlíðarenda og höfðu gestirnir að lokum betur með tveimur mörkum gegn einu.

Jakup Thomsen kom FH yfir á 29. mínútu leiksins og svo í síðari hálfleik bætti Atli Guðnason við öðru. Valsmenn löguðu stöðuna á 69. mínútu er Birnir Snær Ingason skoraði en lengra komust heimamenn ekki.

Þegar besta lið landsins síðustu ár, hikstar eru gagnrýnisraddir fljótar að spretta upp. Þær heyrast víða eftir jafnteflið gegn Víkingi í fyrstu umferð Pepsi Max-deildarinnar, og eftir tapið í gær.

,,Mér finnst voða lítið að frétta úr uppspili og öðru, ég velti því fyrir mér hvort þessi kaupstefna. Að hrúga inn mönnum í stað þess að taka tvo í háklassa. Að taka þá fimm ágæta leikmenn,“ sagði Kristján Óli Sigurðsson í Dr. Football í dag.

Nýir leikmenn Vals eru ekki að heilla Kristján og fær danski miðjumaðurinn, Lasse Petry á baukinn.

,,Kaj Leó er ekki að heilla mig, Lasse Petry átti að vera einhver besti miðjumaður sem hefur komið í íslenska boltann, hann getur ekkert.“

,,Ólafur Karl Finsen er ekki að finna sig, Gary Martin er allt of massaður,“ sagði Kristján en fleiri gagnrýna Gary þessa dagana.

Þar á meðal er Ómar Ingi sem er bróðir Orra Sigurðar Ómarssonar, sem gekk aftur í raðir Vals í vetur. Hann segir hann ekki nýta færin.

,,Það myndi hjálpa Vali mikið ef Gary þyrfti ekki 10 færi til að skora mark,“ skrifar Ómar á Twitter eftir leikinn í gær.

Það myndi hjálpa Vali mikið ef Gary þyrfti ekki 10 færi til að skora mark

— Ómar Ingi (@OmarIngiGud) May 1, 2019