Alex Oxlade-Chamberlain, leikmaður Liverpool, þarf að hengja treyju Andrew Robertson á vegg heima hjá sér.

Þetta staðfesti Robertson í gær en þeir tveir tóku létt veðmál áður en tímabilið á Englandi hófst.

Oxlade-Chamberlain hafði ekki trú á að Robertson myndi leggja upp tíu eða fleiri mörk í deildinni en Skotinn hefur einmitt náð þeim áfanga.

,,Þegar ég gekk að honum í hálfleik þá spurði ég hann: ‘hvar ætlaru að setja treyjuna?’ sagði Robertson.

,,Ég vil sjá hann hengja treyjuna fyrir ofan rúmið svo hann hugsi um mig áður en hann fer að sofa.“

,,Í byrjun tímabils vorum við bara að grínast: ‘ef þú leggur upp 10 mörk í deildinni, áritaðu þá treyju og ég skal hengja hana upp á vegg.’

,,Ég held að hann hafi ekki búist við þessu og varð stressaður – ég er þó glaður með að hafa náð þessu og fá ‘Robertson 26’ treyju upp á vegg hjá honum.“