Rúnar Kristinsson, þjálfari KR, virðist vera ófeiminn að taka til hendinni ef marka má Dr. Football, hlaðvarpsþáttinn í dag. Rúnar átti magnaðan feril sem leikmaður og er leikjahæsti leikmaður í sögu Íslands.

Hjörvar Hafliðason greindi frá því að þegar KR fékk Prince Rajcomar frá Breiðablik, þá hafi Rúnar mætt að bera húsögn sem hann hafði gefið honum. Þetta var árið 2009.

,,Rúnar er einstakur náungi, á mjög margan hátt. Þegar Prince Rajcomar fór í KR, þá sagði ég við Prince að ég ætti einhver húsgögn sem hann mætti taka, hver haldið þið að hafi mætt og hjálpað að taka þetta? Rúnar sem var þá yfirmaður knattspyrnumála hjá KR,“ sagði Dr-inn sjálfur í þætti dagsins.

KR-ingar hafa verið að gera klefann sinn flottari í vetur og þar hefur Rúnar verið sveittur að gera og græja. Ekki margir þjálfarar standa í slíku.

,,Hafið þið séð nýja klefann hjá KR? Þetta er eitthvað sem Rúnar hefur verið sveittur við að gera. Ég heimsótti Rúnar í vinnuna í fyrra, þá var hann að merkja æfingafatnað.“

,,Maður er oft í kringum gæa sem hafa bara spilað á Íslandi, þeir þurfa að fá allt upp í hendurnar. Rúnar veður í öll verk.“

Hrafnkell Freyr Ágústsson, var gestur í þætti Hjörvars og sagði einstakt hvernig Rúnar heldur utan um leikmennina sína.

,,Við getum líka tekið dæmi um það hvernig Rúnar tekur utan um leikmennina sína, talar um Beiti sem besta markvörð Íslands. Hvernig hann tók utan um Björgvin Stefánsson í fyrra, var frábært,“ sagði Hrafnkell en Björgvin mætti í annarlegu ástandi á æfingu KR í fyrra.

Rúnar og aðrir KR-ingar tóku þá þétt utan um Björgvin sem fór í meðferð og hefur síðan blómstrað í KR.