Hörður Snævar Jónsson skrifar frá Peralada á Spáni:

Birkir Már Sævarsson, bakvörður Vals er klár í slaginn gegn Andorra á föstudag, þá hefst undankeppni EM og íslenska liðið hefur hafið undirbúning.

Birkir segir hungur í hópnum en árið 2018, vann liðið ekki einn leik. Það þarf því að snúa skútunni við og koma liðinu aftur í fremstu röð.

,,Ég held að það sé klárt að við viljum fara að vinna leiki aftur, ná frammistöðum sem við vorum að ná fyrir síðast ár. Þrátt fyrir að leikirnir á HM hafi ekki verið slæmir, þá náðum við engum úrslitum nema gegn Argentínu. Við viljum fara að sýna okkar rétta andlit,“ sagði Birkir við blaðamann þegar hann ræddi við hann á Spáni í dag.

Birkir er með verkefni frá félagi sínu á Íslandi sem reynir að klófesta Hannes Þór Halldórsson landsliðsmarkvörð. Allt stefnir í að hann semji við liðið en Birkir þarf að klára málin.

,,Ég sé alveg um það, ég tek nokkur samtöl við hann og við klárum þetta,“ sagði Birkir um málið, og er augljóslega spenntur að fá Hannes heim. Hannes er á mála hjá Qarabag en vinnur í því að losna þaðan

,,Ef virkir landsliðsmenn koma, er það alltaf styrkur, við höfum samt ekki áhyggjur ef Hannes kemur ekki. Við erum með öfluga menn í Antoni og Svenna. Það er ekkert vesen ef Hannes kemur ekki.“

Viðtalið við Birki er í heild hérna.