Alexis Sanchez, sóknarmaður Manchester United er eins og flaska af tómatsósu að mati Ole Gunnar Solskjær, stjóra liðsins.
Sanchez hefur verið í tómum vandræðum innan vallar á sínu fyrsta ári hjá félaginu, hann fær tækifæri í byrjunarliði Manchester United í kvöld.
United heimsækir Chelsea í enska bikarnum í kvöld en Anthony Martial og Jesse Lingard eru meiddir.
,,Hann er mjög góður leikmaður, hann er mjög hæfileikaríkur en það er ekki hægt að ræða svona hluti endalaust,“ sagði Solskjær.
,,Það sást gegn Fulham, þegar hann fær færi, þá er hann kvikur. Hann vinnur boltann og hefur mikla orku.“
,,Ef hann nær einu marki, þá mun það búa til sjálfstraust. Um það snýst þetta þegar sjálfstraustið er lítið.“
,,Hann er virkilega góður leikmaður, við vitum það. Þetta er eins og flaska af tómatsósu, stundum kemur ekkert og svo sullast allt út.“