Það verður hart barist þann 9 febrúar þegar kosið verður um formann Knattspyrnusambands Íslands, Guðni Bergsson, sitjandi formaður sækist eftir endurkjöri. Þá er Geir Þorsteinsson, fyrrum formaður og framkvæmdarstjóri sambandsins í framboði. Möguleiki er á að Ragnheiður Ríkharðsdóttir fari í framboð.

Framboð Geirs hefur vakið athygli, tvö ár eru síðan að hann lét af störfum. Hann hafði verið formaður og framkvæmdarstjóri hjá sambandinu í fjölda ára. Síðan þá hefur hann legið í dvala en sækist eftir því að komast að aftur.

Geir og Guðni eru byrjaðir að arka um landið í von um að ná kjöri, báðir hafa þeir verið að funda með félögum og kynna hugmyndir sínar.

,,Formaður og heiðursformaður KSÍ kíktu Við í kaffibolla á Vivaldivöll í gær og fóru yfir málin með stjórn knattspyrnudeildar Gróttu. En eins og alþjóð veit bauð Geir Þorsteinsson sig fram gegn sitjandi formanni KSÍ Guðna Bergs,“ sagði Grótta á Facebook í gær.

Ljóst er að þeir félagar munu reyna að heimsækja flest félög í von um að tryggja sér starfið.