Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Næsti gestur þáttarins er Hörður Magnússon knattspyrnulýsandi og fyrrum landsliðsmaður í knattspyrnu.
Hörður hefur ekki tekið skrefið út í þjálfun eins og margir kollegar sínir í gegnum árin.
Hörður hafði áhuga á að gerast aðstoðarþjálfari FH á sínum tíma er liðið var undir stjórn Ólafs Jóhannessonar.
Ólafur hafði þó ekki mikinn áhuga á að fá Hörð með sér í lið en samband þeirra hefur alltaf verið ‘eldfimt’ eins og Hörður orðar það.
,,Eins og Þórir heitinn Jónsson sagði við mig: ‘Höddi við borgum fyrir þig þjálfun’,“ sagði Hörður.
,,Síðan gerist það að ég fer í íþróttafréttamennskuna sem var ekkert fyrirfram ákveðið.“
,,Það kemur upp 2005, þegar Leifur Garðars hættir sem aðstoðarþjálfari FH þá hef ég samband við Óla Jó og lýsi yfir áhuga á að gerast aðstoðarþjálfari.“
,,Hann var ekkert sérstaklega hrifinn af því. Við áttum nokkur hressileg orð okkar á milli og það greri ekkert um heilt þarna í tvö ár.“
,,Fyrir nokkrum árum var ég að spá í að taka einhverjar gráður en ég hugsa bara að ég sé orðinn of gamall til að spá í þetta.“
,,Ég hef aldrei sóst eftir þessu. Ég er ekki með einhver rosaleg tengsl hér og þar, ég er vissulega með tengsl í mitt félag en samband mitt og Óla Jó hefur til dæmis alltaf verið eldfimt.“
,,Ég ber rosalega virðingu fyrir honum og það var hann sem hafði trú á mér. Hann getur verið brutal og sagt hluti sem er betur látið ósagt.“
,,Það var þarna tímabil þar sem við vorum engir sérstakir vinir þó ég telji mig hafa hjálpað honum er hann var að hefja sinn alvöru þjálfaraferil hjá FH.“
Meira:
Einelti í garð Harðar fékk að ganga í mörg ár: Sonur Bjössa Bollu og Höddi Skinka – ,,Yrði kæft í fæðingu í dag“
Sopranos og KR mafían – ,,Vesturbærinn kom á okkur eins og flóðbylgja“
Höddi Magg svarar Benedikt Bóasi: Ósanngjörn, illa ígrunduð og algjörlega út úr kú