Miðjumaðurinn Sam Hewson hefur gert þriggja ára samning við lið Fylki í Pepsi-deild karla og var þeta staðfest í dag.

Hewson kemur til Fylkis frá Grindavík þar sem hann lék í tvö ár og þótti standa sig ansi vel.

Tilkynning Fylkis:

Knattspyrnudeild Fylkis skrifaði í dag undir 3 ára samning við miðjumanninn Sam Hewson sem gengur í raðir félagsins úr Grindavík þar sem hann hefur leikið síðastliðin 2 ár.

Sam er uppalinn í Bolton og spilaði meðal annars með varaliði Manchester United áður en hann gekk í raðir Fram árið 2011. Sam hefur einnig spilað með FH og Grindavík, eins og áður segir.
Sam hefur spilað 128 leiki í efstu deild og skorað í þeim 8 mörk. Að auki hefur Sam spilað 7 Evrópuleiki og skorað í þeim 1 mark.

Knattspyrnudeild Fylkis býður Sam velkominn í félagið, lýsir yfir mikilli ánægju með þennan nýjasta liðsmann okkar og væntir mikils af honum í þeirri baráttu sem framundan er.