Ólafur Jóhannesson, þjálfari Vals spáir því að miklir erfiðleikar verði hjá íslenska karlalandsliðinu næstu árin. Þetta kemur fram í viðtali við RÚV:

Ólafur stýrði landsliðinu á árum áður en þar tók hann inn unga leikmenn sem bera liðið uppi í dag.

Lars Lagerback og síðan Heimir Hallgrímsson tóku við góðu búi frá Ólafi sem skilaði liðinu inn á EM og HM.

Á föstudag mun Erik Hamren velja sinn annan landsliðshóp en hann fékk útreið í sínu fyrsta verkefni. Ólafur telur að Hamren hafi ekki valið hóp sinn fyrir leikina gegn Sviss og Belgíu.

„Auðvitað þarf að yngja þetta upp, ég vil meina það. Ég var mjög ósáttur við margt sem var valið í þessa tvo leiki. Enda held ég að hann hafi ekki valið það, þessi Hamrén, það getur ekki verið,“ sagði Ólafur við RÚV.

Ætla má þá að Freyr Alexandersson, aðstoðarþjálfari Hamren hafi valið hópinn ef marka má orð Ólafs.

„Það hafa aðrir menn valið þetta fyrir hann. Af því að hann var ráðinn landsliðsþjálfari þegar voru tíu dagar í leik, hann þarf að fá einhverja aðstoð til að velja leikmennina því hann þekkir það ekki sjálfur.“

„En ég held að hann eigi eftir að setja sinn svip á þetta og vonandi verður það gott.“