Þýski bikarinn er farinn af stað en fjölmargir leikir fóru fram í dag og voru stórlið í eldlínunni.
Lið á borð við Bayern Munchen, Bayer Leverkusen, Werder Bremen, Hoffenheim og Wolfsburg tryggðu sér öll áfram í dag.
Það sama má ekki segja um lið Eintracht Frankfurt sem vann bikarinn á síðustu leiktíð eftir sigur á Bayern í úrslitaleiknum.
Bikarmeistararnir eru úr leik eftir aðeins eina umferð en liðið mætti smáliðinu Ulm í dag og tapaði 2-1!
Ulm leikur í fjórðu efstu deild í Þýskalandi og gerði sér lítið fyrir og sló bikarmeistarana út með frábærum sigri.
