KR er komið í fjórða sæti Pepsi-deildar karla eftir sigur á Stjörnunni á Alvogen vellinum í Vesturbænum í kvöld.
Aðeins eitt mark var skorað í leik kvöldsins en það gerði reynsluboltinn Óskar Örn Hauksson fyrir KR úr aukaspyrnu í fyrri hálfleik.
Hér má sjá það góða og slæma úr leiknum.
Plús:
Sigurinn gerir mikið fyrir KR. Liðið lyftir sér upp í fjórða sæti deildarinnar og er nú átta stigum á eftir toppliði Vals.
Óskar Örn Hauksson gerði eina mark leiksins fyrir KR úr aukaspyrnu. Markið var frábært en Óskar þrumaði boltanum upp í þaknetið af stuttu færi.
KR-ingar voru mjög skynsamir í síðari hálfleik. Sóttu ekki á of mörgum mönnum og tóku engar áhættur með að fá á sig jöfnunarmark.
Það var allt gefið í sölurnar á KR vellinum. Það voru brot, gul spjöld, læti og alvöru tæklingar. Fullorðins leikur í vesturbænum.
Á Albert Watson að byrja alla leiki KR? Hann var á bekknum í dag og ég held að það hafi ekki komið niður á þeim svarthvítu. Hefur oft virkað hægur og mistækur í sumar.
Mínus:
Það hjálpaði Stjörnumönnum alls ekki neitt að missa Guðjón Baldvinsson af velli snemma í síðari hálfleik. Eitthvað er að hrjá framherjann sem haltaði af velli.
Hilmar Árni Halldórsson hefur fengið endalaust lof í sumar fyrir sína frammistöðu. Hann var þó týndur í dag og var alls ekki upp á sitt besta.
Stjörnumenn eru stálheppnir að hafa ekki fengið á sig fleiri mörk. Vörn liðsins var galopin í síðari hálfleik og KR-ingar klaufar að nýta sér það ekki.
Stjarnan gerði sér oft lífið leitt með hvernig þeir reyndu að sækja á KR. Það var lítið um eitthvað spil og var notast við einstaklingshlaup og langar sendingar.