Mesut Özil, leikmaður Arsenal á Englandi, er hættur að leika með landsliði Þýskalands. Hann hefur sjálfur staðfest þessar fregnir.
Þessi 29 ára gamli leikmaður var mikið gagnrýndur á HM í sumar er Þýskaland féll úr leik í riðlakeppni mótsins.
Þýskaland tapaði mjög óvænt gegn Suður-Kóreu í lokaleik sínum í riðlinum og komst ekki í 16-liða úrslit.
Margir kenndu Özil um gengi þýska liðsins og þá sérstaklega fyrir frammistöðu hans í fyrsta leiknum gegn Mexíkó sem tapaðist.
Özil greindi frá því í dag að landsliðsskórnir væru komnir á hilluna en hann á að baki 92 leiki fyrir þjóð sína.
Özil spilaði sinn fyrsta landsleik árið 2009 og varð heimsmeistari með Þýskalandi 2014.