Heimir Hallgrímsson er hættur sem þjálfari A landsliðs karla en hann greindi frá þessum fregnum í dag.
Heimir svaraði spurningum blaðamanna á blaðamannafundi í dag og ræddi hin ýmis mál, þar á meðal stöðu knattspyrnusambandsins.
Heimir segist ekki hafa farið í það sem má kalla samningaviðræður við KSÍ og ákvað á endanum að það yrði ósanngjarnt ef hann myndi aðeins stýra liðinu í næstu keppni, þjóðadeildinni.
,,Það fer eftir því hvernig þú túlkar samningaviðræður. Ég get eiginlega ekki sagt að það hafi farið í einhverjar viðræður, við vorum að henda hugmyndum á milli og spjöllum saman,“ sagði Heimir.
,,Ég veit hvernig staðan hjá KSÍ hvað varðar laun, við kláruðum það löngu áður en HM fór af stað, hvaða möguleikar væru í stöðunni. Ég veit að það er ekki svigrúm, launalega séð hjá knattspyrnusambandinu.“
,,Ég skil það og virði þeirra stöðu þannig laun komu aldrei til umræðu. Það eina sem ég vildi vita hvort það væri möguleiki að taka bara þjóðadeildina og svo þegar við fórum að ræða það þá er það ósanngjarnt að taka kannski rjómann af öllum skemmtilegustu verkefnunum.“
,,Ef ég myndi hætta eftir þjóðadeild þá fengi nýr þjálfari engan undirbúningsleik fyrir EM 2020 þannig mér fannst það falla um sjálft sig. Ástæðan er sú að tveggja ára samning er þriggja ára samningur því við munum fara í lokakeppni EM og þá væri ég búinn að vera þarna í tíu ár. Það fannst mér of mikið.“