Heimir Hallgrímsson hefur ákveðið að skrifa ekki undir nýjan samning við KSÍ og stígur til hliðar sem landsliðsþjálfari karlalandsliðsins.

Guðni Bergsson, formaður KSÍ, segir niðurstöðuna svekkjandi og að það hafi alltaf verið áætlunin að framlengja samning Heimis.

Guðni segir að KSÍ hafi bundið miklar vonir við að Heimir yrði áfram en að niðurstaðan væri önnur.

„Heimir var auðvitað okkar fyrsti kostur í starfið, enda hefur hann unnið frábært starf á þessum árum sem hann hefur verið með liðið,“ sagði Guðni.

,,Íslensk knattspyrna hefur aldrei staðið jafn framarlega og aldrei áður notið jafn mikillar athygli hérlendis sem erlendis.“

,,Við bundum miklar vonir við að Heimir yrði áfram, en niðurstaðan er þó sú að Heimir hættir með liðið að eigin ósk og vil ég fyrir hönd KSÍ þakka honum kærlega fyrir samstarfið og óska honum alls hins besta í framtíðinni. KSÍ mun nú taka næstu skref í ráðningu nýs landsliðsþjálfara“.