„Við erum að fara vinna þetta,“ sagði Rafn Haraldur Rafnsson, stuðningsmaður íslenska landsliðsins, þegar blaðamaður hitti hann í Moskvu í dag. Rafn var staddur í borginni ásamt félögum sínum en þeir eru á leið á leik Íslands og Argentínu á HM á morgun. Rafn á von á því að óvænt atvik í fyrri hálfleik setji strik í reikninginn.

„Mascherano fær rautt snemma í fyrri hálfleik og eftir það opnast allt hjá Argentínumönnum. Aðspurður hvort hann hafi ekki áhyggjur af leikmanni eins og Messi svaraði Rafn: „Við höfum alveg sýnt að við getum stoppað þessu bestu. Ég held að honum verði beint inn á miðjuna þar sem hann verður bara étinn. Eigum við ekki að leyfa þeim að hafa áhyggjur af okkur bara?“

Rafn segir að Ísland fari upp úr þessum riðli en síðan verðum við að sjá hver andstæðingurinn í 16-liða úrslitum verður. Rafn fór á Evrópumótið 2016 en svo vildi til að hann sá alla leikina sem Ísland vann ekki. „Ég ætti kannski að halda mig á hótelinu meðan leikurinn er,“ sagði Rafn léttur.

DV ræddi einnig við félaga Rafns, Trausta Ágúst Hermannsson, sem var hóflega bjartsýnn fyrir morgundaginn. „Við eigum eftir að gera þeim erfitt fyrir en sjáum hvernig fer.“

Viðtölin við þá félaga má sjá hér að neðan en í byrjun má sjá nokkra hressa Argentínumenn sem trufluðu viðtalið og vildu ólmir láta mynda sig með íslensku stuðningsmönnunum.