Manchester United og Tottenham mættust í undanúrslitum FA-bikarsins í dag en leiknum lauk með 2-1 sigri United.

Dele Alli kom Tottenham yfir snemma leiks en Alexis Sanchez jafnaði metin fyrir United og staðan því 1-1 í hálfleik.

Það var svo Ander Herrera sem skoraði sigurmark leiksins á 62. mínútu og United fer því áfram í úrslit keppninnar en Tottenham er úr leik.

Dele Alli, miðjumaður Tottenham var gríðarlega svekktur með að komast ekki áfram í úrslitaleikinn.

„Við brugðumst sjálfum okkur og það svíður. Núna þurfum við að rífa okkur aftur í gang og klára þetta tímabili almennilega,“ sagði Alli.

„Þú getur ekki komist 1-0 yfir gegn liði eins og Manchester United og misst það svo niður í 1-2. Við eigum ekki að koma okkur í þannig aðstæður.“

„Við stýrðum leiknum allan tímann og þetta átti ekki að gerast. Það vilja allir hérna vinna titla. Við verðum að hætta að tala um að vinna eitthvað og fara að vinna eitthvað.“

„Við getum ekki kastað þessum leikjum endalaust frá okkur, við verðum að bæta okkur og halda áfram,“ sagði Alli að lokum.