Marek Hamsik, fyrirliði Napoli segist ekki vera búinn að gefast upp á því að vinna ítölsku úrvalsdeildina.
Napoli gerði markalaust jafntefli við AC Milan um helgina en liðið fékk sannkallað dauðafæra til þess að vinna leikinn í uppbótartíma en tókst ekki að skora.
Liðið er nú í öðru sæti deildarinnar með 78 stig, sex stigum á eftir Juventus þegar sex umferðir eru eftir af tímabilinu.
„Það er ágætis bil á milli okkar og Juventus en við erum ekki búnir að gefast upp, við munum halda áfram að berjast þangað til að tímabilið er búið,“ sagði Hamsik.
„Við vorum mjög svekktir eftir leikinn gegn AC Milan. Við sköpuðum okkur helling af færum en tóst ekki að skora og það er pirrandi.“
„Við tökum núna einn leik fyrir í einu og á meðan að það er ennþá möguleiki, þá gefum við allt í þetta,“ sagði hann að lokum.