Gunnar ætlar að nýta reynsluna – Kemur sterkari til baka
Gunnar Nelson mættti Argentínumanninum Santiago Ponzinibbio í Glasgow í Skotlandi í gær. Fyrir bardagann þótti Gunnar mun sigurstranglegri. Voru flestir áhorfendur á bandi íslenska bardaga kappans sem sótti hart að Santiago í byrjun. En eftir aðeins rúma mínútu hafði Santiago rotað Gunnar Nelson.
Fjölmargir Íslendingar hafa sakað Santiago um svindl í bardaganum. Hann hafi potað í bæði augu Gunnars Nelson, sjá mynd hér. Sagði Gunnar á blaðamannafundi eftir bardagann að hann sæi eftir að hafa ekki sjálfur stöðvað bardagann þar sem hann sá tvöfalt eftir að hafa fengið fingur Argentínumannsins í augun.
Augnapotið var ekki það eina umdeilda sem átti sér stað í gær. Óprúttinn aðdáandi Santiagos tók sig til fyrir bardagann og breytti umfjöllun um Gunnar Nelson á Wikipedia. Afþreygingarsíðan Menn.is greindi fyrst frá þessu. Fyrir þá sem ekki vita er Wikipedia frjálst alfræðirit og geta notendur tekið þátt í að bæta og breyta síðunni, sjá umfjöllun um Gunnar á Wikipedia hér. Á Wikipedia segir:
„Fylgst er með skemmdarverkum og bulli og er slíkt yfirleitt fjarlægt fljótt.“
Nafn Gunnars var fjarlægt af aðdáanda Santiago og hann uppnefndur Herra rass og fyrir neðan myndina stóð að hann hefði látið lífið í Glasgow. Fékk þessi texti að standa á Wikipedia í tólf mínútur og var leiðrétt klukkan 21:04. Gunnar tjáir sig í dag á Facebook-síðu sinni og þakkar þar þjálfurum, fjölskyldu og styrktaraðilum sem og aðdáendum sem lögðu leið sína í bardagahöllina.
„Andrúmsloftið í Glasgow var ótrúleg og ég mun aldrei gleyma því. […] Þetta var ekki mitt kvöld og það er erfitt að kyngja þessu tapi en svona er lífið,“ segir Gunnar sem er hvergi af baki dottinn og kveðst ætla að nýta sér þessa reynslu til að styrkja sig fyrir þá bardaga sem eru fram undan.