Óvenjulegt atvik kom upp í dómsal í Michigan í Bandaríkjunum fyrir skemmstu þegar móðir sakbornings var dæmd í fangelsi fyrir ósiðlega hegðun í dómsal.

Verið var að rétta yfir hinni 25 ára gömlu Amöndu Kosal sem var ákærð fyrir að valda dauða manns þegar hún ók undir áhrifum áfengis. Systir fórnarlambsins var að flytja ræðu þegar móðir Amöndu heyrðist flissa.

Dómaranum í málinu, Qiana Lillard, var hins vegar ekki hlátur í huga og las hún móður Amöndu pistilinn – og öðrum sem dirfðust að hlæja meðan á réttarhöldunum stóð.

„Þetta er dómsalur og hér er verið að fjalla um grafalvarlegt mál. Ég skil að þið eru reið vegna þess að ástvinur ykkar er á leið í fangelsi, en, sjáið til, hún er á leið í fangelsi vegna ákvörðunar sem hún tók. Þetta fólk hér er að syrgja ástvin vegna heimskulegrar ákvörðunar sem endaði með dauða. Og þið sitjið hér og haldið að þetta sé eitthvað grín. Ekki í dómsal 502. Ekki í dag eða nokkurn annan dag,“ sagði Qiana.

Á myndbandsupptöku má sjá þegar laganna vörður leiddi móður Amöndu burt áður en Qiana sagði: „Þessi óvirðing sem þú sýndir truflaði réttinn og þú, fröken, ferð í Wayne County-fangelsið í 93 daga.“

Þess má geta að Amanda Kosal var dæmd í 3 til 15 ára fangelsi fyrir ölvunaraksturinn í fyrrasumar sem endaði með dauða Jerome Zirker sem var 31 árs. Eiginkona hans, Brittany Johnson, slasaðist einnig alvarlega.