Smyglaði gulli úr myntsláttu kanadíska ríkisins í endaþarminum
Kanadamaðurinn Leston Lawrence er sannkallaður gullrass en hann var staðinn að því að hafa smyglað gulli að andvirði 165 þúsund dala úr Royal Canadian-myntsláttu kanadíska ríkisins með því að fela það í endaþarmi sínum. Hann var fundinn sekur í nóvember fyrir að hafa smyglað 22 litlum gullstykkjum út úr peningasmiðju ríkisins og loks dæmdur í 30 mánaða fangelsi nú í vikunni.
Þá var honum gert að endurgreiða fyrrverandi vinnuveitanda sínum 165 þúsund dali og hefur til þess þrjú ár eftir að hann losnar úr fangelsi. Takist honum það ekki bíður hans 30 mánaða fangelsisvist til viðbótar.
Málið er allt hið furðulegasta en Lawrence hafði margoft verið stöðvaður við málmleitartæki fyrir starfsmenn sem farið hafði í gang en síðan sleppt án athugasemda þegar málmleitarvöndur öryggisvarða gaf til kynna að hann væri ekki með neitt í fórum sínum.
Fram kom í máli saksóknara í réttarhöldunum að Lawrence hefði selt gullsölum þýfið í Ottawa og fengið um 100 þúsund dali fyrir. Ágóðan notaði gullbossabófinn síðan til að kaupa sér hús á Jamaíka og bát á Flórída. Hann hafði unnið í Royal Canadian-myntsláttunni í sjö ár við að bræða gull, hreinsa það og þurfti hann reglulega að taka prufur með þar til gerði ausu. Gullmolarnir sem hann stal, voru einmitt í laginu eins og ausubotninn.
Grunsemdir vöknuðu fyrst að ekki væri allt með felldu hjá honum þegar samstarfsmaður Lawrence fann vaselín og gúmmíhanska í vinnuskáp hans. Í öryggishólfi hans fundust síðan fjórir gullmolar sem pössuðu við ausuna hans en þeir voru svipaðir að þvermáli og golfkúla. Gullið sem um ræðir er þó ekki kúlulaga heldur fremur í laginu eins og íshokkípökkur og rúmlega tvöfalt þykkari en Oreo-kexkaka þannig að eitthvað hefur hann þurft að hafa fyrir smyglinu blessaður.