Dómstóll í Kaliforníu dæmdi á föstudag 32 ára karlmann, Daniel Wozniak, til dauða fyrir að myrða nágranna sína árið 2010. Fórnarlömbin í málinu hétu Samuel Herr, 26 ára, og kærasta hans, Juri Kibuishi, 23 ára.

Saksóknarar sögðu fyrir dómi að kveikjan að morðunum hafi verið peningaskortur Daniels. Í frétt Los Angeles Times kemur fram að Daniel hafi ekki haft efni á að halda brúðkaup og fara í brúðkaupsferðina sem hann dreymdi um. Til að bæta úr því myrti hann nágranna sinn, fyrrnefndan Samuel Herr, og ætlaði hann sér að stela 62 þúsund Bandaríkjadölum sem Samuel hafði safnað sér eftir herþjónustu í Afganistan.

Daniel er sagður hafa skotið Samuel til bana í yfirgefnu leikhúsi áður en hann sundurlimaði lík hans. Því næst notaði hann síma Samuels til að lokka kærustu hans, Juri, til sín. Þegar hún kom í umrætt leikhús skaut hann hana til bana.

Nokkrum dögum síðar var Daniel handtekinn eftir að hann reyndi að taka út peninga úr hraðbanka með korti Samuels. Í frétt OC Register kemur fram að Daniel hafi verið handtekinn í eigin steggjapartýi.

„Þú, Dan, ert heigull og ástæða þess að dauðarefsing er nauðsynleg í Kaliforníu,“ sagði faðir Samuels áður en dómur var kveðinn upp. Unnusta Daniels á þessum tíma, Rachel Buffet, hefur verið ákærð fyrir að leggja unnusta sínum hjálparhönd eftir voðaverkin.