Hún var í mánaðarprísund – Hann kallaði það ást
Eitthvað leggja karl nokkur frá Óðinsvéum og kona frá Pandrup í Danmörku ólíkan skilning í hvað felist í sannri ást. Um er að ræða rúmlega sjötuga danska konu og 58 ára serbneskan mann sem kynntust fyrir tilstuðlan stefnumótasíðu sumarið 2015. Skötuhjúin hafa ekki verið nafngreind, enn sem komið er, en mál þeirra er á borði danska réttarkerfisins.
Hvað sem nöfnum þeirra líður þá gat konan, að sögn hins serbneska sjarmatrölls, fyrir rétti í Óðinsvéum á mánudaginn, vart á sér heilli tekið eftir að hún hafði barið hann augum í fyrsta sinn og vildi flytja inn til hans „med det samme“.
Áður en lengra er haldið er rétt að komi fram að maðurinn er ákærður fyrir að hafa haldið konunni fanginni í rúman mánuð; frá 28. ágúst til 1. október 2015.
Í huga mannsins var um ástarsamband að ræða. „Við vorum ástfangin og hún sagði að í fyrsta skipti í mörg ár hefði hún átt huggulega kvöldstund,“ sagði maðurinn um fyrstu samverustund þeirra.
Þegar hann hugsaði til baka komst hann að þeirri niðurstöðu að henni hefði liðið „eins og blóma í eggi“. Saksóknari í málinu leyfir sér að efast um réttmæti þess mats serbneska karlsins. Hann sýndi fyrir rétti ljósmyndir af konunni. Hún var blá og marin á handleggjum, þjóhnöppum, lærum og annarri kinninni.
Saksóknari telur engum vafa undirorpið að maðurinn hafi haldið konunni nauðugri um mánaðarskeið og, samkvæmt ákæru, látið hendur skipta og hótað henni dauða með það fyrir augum að komast yfir fjármuni hennar.
Manninum er gefið að sök að hafa neytt konuna til að yfirfæra að minnsta kosti 91.200 danskar krónur, ígildi rúmlega 1,6 milljóna íslenskra króna, á reikning hans og tengdasonar hans, gefa tengdasyninum bíl sinn og þrýsta á hana um að selja íbúð sína langt undir markaðsvirði.
Það er skoðun saksóknara að konan hafi verið undir stöðugu eftirliti, símanotkun hennar takmörkuð, smáskilaboð ritskoðuð og síminn tekinn af henni á kvöldin.
Við rannsókn á heimili hins ákærða fann lögreglan síma konunnar uppi á háum skáp og veski hennar fannst í vasa jakka mannsins. Serbinn fullyrti að hann hefði lánað leigjanda sínum jakkann.
Eftir mánaðardvöl í félagsskap Serbans tókst konunni að sleppa. Þá hafði hún fengið leyfi til að skjótast á salerni á Rosengårdscentret, verslunarmiðstöð í Óðinsvéum, og fékk lánaðan síma hjá ókunnugri konu og hringdi á hjálp.
Serbinn velkist ekki í vafa um að saksóknarinn fari villur vegar í öllum sínum málflutningi; hann og konan voru í alvarlegu sambandi.
„Ég elska hana, og ég vil endilega að hún elski mig. Það gerir húnn enn þá, það veit ég,“ sagði hann í réttinum.
Reiknað er með að dómur falli í málinu 1. september.