Frakki einn á besta aldri átti ekki von á því að hús sem hann erfði frá látnum ættingjum sínum í Normandy í norðvesturhluta landsins myndi koma honum í heimsfréttirnar. Raunin varð þó önnur.
Þegar maðurinn fór að skoða húsið nánar, til dæmis innanstokksmuni, kom í ljós að víða í húsinu leyndist gríðarlegt magn af gulli. Þetta staðfestir Nicolas Fierfort, uppboðshaldari í Normandy, í samtali við AFP-fréttaveituna. Nicolas var fenginn til að verðmeta þá muni sem fundust í húsinu og við nánari skoðun fannst gullið.
„Það voru þarna 5.000 gullpeningar, tvær tólf kílóa gullstengur og 37 stengur sem vógu eitt kíló,“ segir Nicolas. Nicolas mat það svo að verðmæti gullsins hafi numið 3,5 milljónum evra, 420 milljónum króna. Hann segir að gullið hafi verið vandlega falið víðsvegar um húsið; undir húsgögnum, á baðherberginu og milli þilja.
Rannsókn leiddi í ljós að gullið hafði fyrri eigandi hússins keypt á sjötta og sjöunda áratug liðinnar aldar og fundust staðfestingar þess efnis, vottuð skjöl, í húsinu. Samkvæmt frétt Guardian, sem vísar í AFP, var gullið selt á uppboði fyrir skemmstu.